LMC Chairman Lalzuithanga chu Khuallian niin, Lunglei mipui zawng zawngte Lunglei Ni chibai a buk a. Lunglei Ni chu hlim ni, lawm ni a nih rualin, hlim leh lawm taka hmanga tawp mai tur erawh chuan a uiawm tih sawiin, Lunglei chu eng nge a nih a, Lunglei mipuite'n eng nge an tih theih sang ber tih hmu chhuak tura thawh rim bul ṭanna ni atan te, ṭhu thluanga sawrkarin min tihsak tur thlir ringawt lo va, mahni thawh chhuah hmang ngeia intodelh dan tur ngaihtuahna ni atan te hmang turin a chah.

Lunglei chu Municipal Council nei, khawpui lian a nih tawh avangin sawrkara innghat pumhlum ngawt lo va, mahni thawh rimna hmanga khawpui enkawl a, hmasawnpui tura mawhphurhna pek a nih thu sawiin, chu mawhphurhna chu hlen tumin LMC chuan theih tawp a chhuah tih a sawi bawk.

LMC Chairman chuan C. Ṭhuamluaia Mual bul chu Multilevel Car Parking atan ruahman a nih thu leh tender chhuah ni a, a thawktu tur pawh tihfel a nih tawh thu sawiin, Theiriat ram TNT chhakah truck 70–80 vel din theihna tur Transport Hub cheng nuai 250 vel senga sak tur te, Sazaikawnah LMC Complex cheng nuai 400 vel senga sak tur te, Ramthar Market te pawh tender chhuak mai tawh tura beisei a nih thu a sawi a. 

Saikuti Hall pawh cheng nuai 500 senga chei ṭhat tur a nih thu leh Finance Department-ah Executive Sanction nghah mek a nih thu a sawi bawk.

Organising Committee Chairman, LMC Chief Executive Officer Lalhmansanga'n hun kaihruaiin, Organising Member Rev. Dr F. Sangvela'n hunserh a hmang a. LMC Vice Chairman K. Lalrinawma'n inlawmna thu sawiin, Events/Activities Committee huaihawt Lunglei Ni puala intihsiakna hrang hrang lawmman sem a ni bawk.